ផលប៉ះពាល់ និងផលប្រយោជន៍បានពីស្ទីលនៃការគេងរាល់យប់របស់អ្នក
យោងតាមការស្រាវជ្រាវថ្មីមួយបានឱ្យដឹងថា ឥរិយាបថការគេងរបស់អ្នកប៉ះពាល់ដល់សុខភាព និងសុខុមាលភាព ។ ស្ទីលនៃការគេងទូទៅ ៥ យ៉ាងរួមមាន ៖ គេងបែរឆ្វេង គេងផ្ងារ គេងបែរទៅស្តាំ គេងផ្កាប់មុខ និងគេងអង្កុញជើង ។
លោក Mandy Francis បានបកស្រាយពីគុណសម្បត្តិ និងគុណវិបត្តិរបស់ស្ទីលនៃការគេងទាំងនេះ ។
គុណសម្បត្តិនៃការគេងបែរទៅឆ្វេង
ឥរិយាបថការគេងបែរឆ្វេងអាចជួយព្យាបាលអាការៈឆ្អល់ក្តៅចុងដង្ហើម ។ អាការៈឆ្អល់ក្តៅចុងដង្ហើមច្រើនកើតឡើងនៅពេលយប់ ។ នៅពេលមនុស្សគេងបែរទៅឆ្វេង សរីរាង្គខាងក្នុងជួយសម្រួល និងកាត់បន្ថយការលេចចេញអាស៊ីតពីក្រពះទៅក្នុងបំពង់អាហារ ដែលជាហេតុធ្វើឱ្យឈឺចាប់ ។
គុណវិបត្តិនៃការគេងបែរទៅឆ្វេង
យោងតាមការសិក្សាបានបង្ហាញថា មនុស្ស ៤០.៩ % គេងបែរឆ្វេងងាយនឹងជួបសុបិន្តអាក្រក់ ។
គុណសម្បត្តិនៃការគេងផ្ងារ
ការគេងផ្ងារជួយតម្រង់ឆ្អឹងខ្នង បំបាត់អាការៈឈឺខ្នង ។ ដោយសារផ្ទៃមុខរបស់អ្នកមិនសង្កត់នឹងខ្នើយរយៈពេល ៦ ម៉ោង ឬច្រើនជាងនេះ វាជួយកាត់បន្ថយស្នាមអុជខ្មៅ និងភាពជ្រីវជ្រួញលើផ្ទៃមុខ ។
គុណវិបត្តិនៃការគេងផ្ងារ
ការគេងផ្ងារអាចធ្វើឱ្យអ្នកស្រម៉ុកឡើងទ្វេដង ដោយសារបំពង់ខ្យល់ដង្ហើមនឹងរួមខ្លី ព្រោះអណ្តាតធ្លាក់ទៅក្រោយបំពង់ក ។
គុណសម្បត្តិនៃការគេងអង្កុញជើង
ការគេងអង្កុញជើងជួយកាត់បន្ថយអារម្មណ៍តានតឹង ធ្វើឱ្យគេងលក់ស្រួល ។ ឥរិយាបថគេងអង្កុញជើងជួយឱ្យឆ្អឹងខ្នងបត់បែនបានងាយពេលប្តូរស្ទីលគេង និងអាចឱ្យអ្នកដកដង្ហើមបានស្រួលផងដែរ ។
គុណវិបត្តិនៃការគេងអង្កុញជើង
ការគេងអង្កុញជើងអាចធ្វើឱ្យអ្នកឈឺក ព្រោះវាដាក់សម្ពាធខ្លាំងទៅលើឆ្អឹងលលាដ៍ក្បាល ។ អ្នកត្រូវគេងដាក់ខ្នើយក្រោមក្បាល ដើម្បីឱ្យក និងឆ្អឹងខ្នងត្រង់ ការពារពីអាការៈឈឺក និងស្មា ។
គុណសម្បត្តិនៃការគេងបែរស្តាំ
គេងបែរទៅស្តាំអាចជួយកាត់បន្ថយសម្ពាធឈាម ចង្វាក់បេះដូង ។ ការគេងបែរស្តាំ ឬឆ្វេងនឹងជួយការពារអ្នកពីជំងឺហឺត ។
គុណវិបត្តិនៃការគេងបែរទៅស្តាំ
ស្ត្រីពពោះគេងបែរស្តាំងាយប្រឈមមុខនឹងការរលូតកូន ។ យោងតាមការស្រាវជ្រាវនៅសកលវិទ្យាល័យ Auckland បានបង្ហាញថា ស្ត្រី ១៥៥ នាក់បានគេងបែរស្តាំ ទីបំផុតកូនស្លាប់ក្នុងផ្ទៃនៅពេលសម្រាល ។
គុណសម្បត្តិនៃការគេងផ្កាប់មុខ
មនុស្សគេងផ្កាប់មុខច្រើនតែសុបិន្តឃើញរួមភេទ ។ ហើយឥរិយាបថនេះធ្វើឱ្យសរីរាង្គខាងក្នុងជម្រុញដល់ការរំលាយអាហារ ។
គុណវិបត្តិនៃការគេងផ្កាប់មុខ
ការគេងបែបនេះអាចបណ្តាលឱ្យឈឺក្បាល រឹងក តឹងស្មា និងឈឺខ្នង ។ ដើម្បីឱ្យដកដង្ហើមបានស្រួល អ្នកត្រូវគេងដាក់ខ្នើយ បែរទៅខាងណាមួយរយៈពេលជាច្រើនម៉ោង ៕
